Tópikonan importante tokante kontaminashon di medio ambiente i salú na Boneiru

Hende ku ta biba na Boneiru ta haña e isla akí un dushi lugá. Pero nan ta preokupá tambe tokante shushi den medio ambiente i si esaki ta dañino pa nan salú. Pa medio di un lista di pregunta i e investigashon di RIVM, nos sa awor kiko ta importante pa medio ambiente i salú na Boneiru.

Shushi ta un tópiko ku hopi biaha nan ta menshoná komo algu ku ta malu pa medio ambiente i salú. Hende tin molèster di shushi riba kaya i den mondi. I sigur e lèntfel (lugá pa depositá shushi) na Lagun ta sòru pa problema.   
 

Otro tópikonan ta stòf, tráfiko, bochincha, yerba di laman ku ta hole stinki, aire, suela i awa shushi. E pregunta ta si e problemanan akí ta malu pa salú di hende na Boneiru.

Nan a menshoná otro tópikonan tambe, ku na e momentu akí RIVM no ta duna konseho tokante di nan: kambio di klima, kalor, mas vegetashon i molèster di bestia. Manera buriku, kabritu, muska i sangura.

Lèntfel, lokalidat Lagun (lugá pa depositá shushi)

E situashon na e lèntfel na Lagun ta e problema di mas urgente. E hendenan ku ta biba pegá ku e seru di shushi, pa hopi tempu kaba tin keho tokante nan salú. I ora tin kandela riba e seru di shushi, nan tin problema pa hala rosea, nan tin ku tosa i nan ta haña doló di wowo.

RIVM ta bisa ku algu tin ku sosodé rápidamente, pa mehorá e situashon. Algun ehèmpel di loke gobièrnu por hasi ta:

• Separá shushi na e lugá di depositá shushi.
• Tapa e lèntfel bon, di manera ku ménos supstansia ta bini liber.
• Usa mas kos di nobo, enbes di tira nan afó.
• Depositá ménos sobrá di kuminda i shushi di kurá posibel. Esaki pasobra nan ta bira kayente i pega na kandela lihé.
• I evitá ku ta surgi kandela. Ora ku tin kandela tòg, sòru pa paga esaki rápidamente.

Ta importante pa haña sa kua eksaktamente ta e supstansianan ku ta bini liber for di e lèntfel. I si e supstansianan akí ta resultá serka hende tambe. Pa medio di midi supstansia den aire i den awa den bisindario di e lèntfel, por haña sa esaki. Si e hendenan den bisindario ta haña muchu hopi supstansia peligroso den nan kurpa, mester tuma mas medida pa protehá nan kontra esaki.

RIVM ta konsehá tambe pa kuminsá rápidamente ku un investigashon tokante kon e hendenan ta sinti nan mes. Kua ta e kehonan ku e habitantenan tin relashoná ku nan salú? Tokante kiko nan tin preokupashon? I kiko e hendenan tin mester pa sinti nan mes mihó? Por hasi esaki pa medio di pasa kas pa kas i tene kòmbersashon, i pa medio di lista di pregunta. Pa medio di e investigashonnan akí gobièrnu por yuda hende mas mihó.

Tuma akshon pa mehorá e lèntfel:

Separá shushi i usa mas tantu kos di nobo.
Depositá ménos sobra di kuminda i shushi di kurá posibel.
Sòru pa bientu no por supla e shushi hib’é den bisindario.

Midi e supstansianan ku ta bini liber for di e lèntfel:

Den aire rònt di e lèntfel i na e kasnan.
Den suela.
Den awa na Lagun.
 

Investigá salú di e hendenan ku ta biba den bisindario:

Investigashon di keho i preokupashon tokante salú.
Kon por yuda e hendenan pa nan sinti nan mes mas mihó.
Puntra ekspertonan si investigashon físiko ta yuda ku esaki.

Den kaso di kandela:

 Sòru pa e hendenan ku ta biba den bisindario no tin mester di inhalá huma.
Paga e kandela rápidamente i adekuadamente.
Splika bon kla kiko ta pasando i kiko ta hasi pa remediá esaki.

Haña mas informashon tokante kontaminashon di medio ambiente i salú

Hopi kos no ta konosí ainda tokante influensia di medio ambiente riba salú na Boneiru. Tin algun investigashon sí tokante salú i medio ambiente ku nan ta bai kuminsá pronto kuné. Pa e motibu akí ta bon pa djòin esakinan. Ku esaki gobièrnu por haña mas informashon tokante salú na Boneiru. Si esaki ta nesesario, midimentu mas tantu biaha den suela, den aire òf den awa por yuda pa skohe medida. Importante ta e ora ei ku e informashon ei ta públiko i ku por hañ’é fásilmente.

Hasi e bisindario mas agradabel pa medio di ménos stòf, rùim op shushi riba kaya i den mondi, i ménos molèster di zonido.

Midi mas tantu biaha den aire, den suela i den awa, por yuda ora di skohe akshon.

Traha huntu ku otro organishonnan pa logra un mihó medio ambiente i ora di hasi investigashon di salú.