Konseho pa akshon i investigashon relashoná ku salú i kontaminashon di medio ambiente na Boneiru
Habitantenan di Boneiru ta haña e isla akí un lugá bunita i dushi pa biba, pero nan tin nesesidat di akshon pa kombatí kontaminashon i e efektonan ku esaki tin riba salú. E preokupashonnan mas grandi ta tokante e seru di shushi ku kada biaha ta bira mas grandi i tokante kandela na lèntfel Lagun. Segun RIVM ta importante pa tuma medida riba término kòrtiku pa mehorá e situashon. Banda di esaki RIVM ta konsehá pa hasi midimentu rònt di e sitio di depositá shushi i pa hasi inventarisashon di salú di e hendenan ku ta biba den bisindario.
Aparte di e lèntfel, tin mas tópiko ku ta importante pa kontaminashon di ambiente di biba, manera shushi riba kaya i den mondi, tráfiko, stòf, molèster di zonido i awa kontaminá. Esaki ta resultá for di un eksplorashon di kontaminashon di medio ambiente na Boneiru i e efektonan ku esaki tin riba salú. Pa esaki RIVM a studia vários investigashon anterior tokante medio ambiente di Boneiru. Banda di esaki RIVM a papia ku diferente organisashon i grupo di habitante ku ta okupá nan mes ku medio ambiente i salú. Tambe pa medio di un lista di pregunta nan a puntra e habitantenan kiko nan ta pensa di nan bisindario.
Medida ta nesesario na e lugá di depositá shushi na Lagun
Pa hopi tempu kaba e hendenan ku ta biba pegá ku e lugá pa depositá shushi ta eksperensiá diferente keho di salú. I ora tin kandela na e lugá di depositá shushi, nan ta sinti benout, i nan tin molèster di tosamentu i doló di wowo.
Segun RIVM ta importante pa riba término kòrtiku tuma medida pa mehorá e situashon. Otro organisashonnan tambe, manera ILT, anteriormente ya kaba a duna konseho tokante esaki. Posibel medidanan ta: tapa tur shushi bon na e lèntfel, mehorá e prosesamentu di shushi, i paga i evitá kandela.
RIVM ta konsehá tambe pa rònt di e lugá pa depositá shushi i rònt di e kasnan den bisindario di esaki, midi kua ta e supstansianan ku ta bini liber i ku por ta dañino pa salú. Investigashon di keho di salú, preokupashon i bienestar mental di e hendenan ku ta biba den bisindario, por yuda gobièrnu di Boneiru mehorá salú. RIVM ta enfatisá ku e investigashon akí no tin mag di okashoná retraso den tumamentu di medida pa mehorá e situashon na e lugá pa depositá shushi.
Haña mas konosementu tokante salú i kontaminashon di medio ambiente na henter e isla
RIVM ta konsehá pa haña mas konosementu pa loke ta trata kontaminashon di medio ambiente i e efektonan ku esaki tin riba salú pa henter e isla. Awor akí tin tiki konosementu di esaki ainda. Akí tambe ta konta ku ta importante pa tuma medida si esaki ta posibel, i kaminda ta nesesario hasi investigashon adishonal. Kua medida òf investigashon esakinan ta, ta diferensiá pa kada tópiko.
RIVM ta konsehá pa hasi uso di resultado di investigashon di salú di poblashon na Boneiru, manera e ‘Gezondheidsmonitor (Omnibus)’ i investigashon di influensia di malesa di infekshon i sirkunstansianan di biba (PIENTER).
Konseho na gobièrnu di Boneiru: kuminsá aktua ku e señalnan ku e habitantenan ta duna
Habitantenan di Boneiru ta preokupá tokante kontaminashon di medio ambiente i e efektonan ku esaki tin riba salú. Nan ke pa e gobièrnu lokal (Entidat Públiko Boneiru) tuma akshon kontra di esaki i komuniká na un manera klarito tokante esaki. RIVM ta konsehá Entidat Públiko Boneiru pa kuminsá aktua a base di e señalnan akí.
RIVM a hasi e eksplorashon akí riba petishon di Entidat Públiko Boneiru den e di dos mitar di aña 2025.